علاش ماخصكش ترجعي لكلبك القديم آبب؟ هبطي قرااي هادشي

مارس 27, 2021   

باش تفهمي مخااطر هاد القرار

عاارفك كتحسي بالحنين تجاه كلبك القديم وماكرهتيش ترجعي معاه آبب، وعارفك أنكِ كتفرحي فاش كيحااول يرجع ليك حيتاش كتحسي براسك (مرغوبة) وإستثنائيَّة وداكشي (وهاد النقطة كيستغلوها الطوامل باش يضحكو على البنات) حيتاش عارفيينها من أشهر نقاط الضعف ديال البنات .. وعارفك أنكِ كتحسي بالأمان مع كلبك القديم أكثر من كلب جديد ماكتعرفيهش مزيان! وعاارف كلّ أحاسيسك تجاه الموضوع آبب غير تهناي فهمتيني؟ راني فاهمك وواخذ بعين الإعتبار مشاعرك كلها ولكن واخا هكذاك مااخصكش ترجعي لكلبك القديم فهمتيني؟ أكبر غلطة غدّيريها فحياتك هي هادي، وها أنا غنشرح ليك الأسباب هنا

واش عرفتي الأطباء كيفاش كيعالجو الناس اللي عندهم (بعض الأنواع) من الفووبيات آبب؟ كيعالجوهم (بمواجهة مخاوفهم) فهمتيني؟ .. يعني مثلاً إذا كاانت عندك فوبيا من القطط ولا الحشرات، الطبيب بالأساليب المدروسة ديالو كيخليك تحتكي بالمخاوف ديالك وتواجهيها آبب فهمتيني؟ .. وهادشي من خلال مجابهة (مصدر الخوف) .. يعني فهاد الحالة مجابهة القطط والحشرات، كلّما واجهتي القطط وخليتيهم يقربو ليك وكذا.. غادي تشافاي تدريجيًا من الفوبيا اللي عندك تجاههم فهمتيني آبب؟ يعني ذاك (الحاجز النفسي) كيتحيد..

ونفس القاعدة تنطبق على أي حاجة آبب فهمتيني؟ أي حاجة أي حاجة كيفما كانت، ونفس القاعدة تنطبق على كلبك القديم كذلك ..

- كيفاش ؟

الراجل آبب فاش كيتصاحب أول مرة مع البنووتة وكيبغي يتفارق معاها كيفكّر ف3 ديال لحوايج..

- واش غايلقى مصدر آخر ديال (الإثارة) من غيرها؟

- واش غايجي راجل آخر وياخذ ليه المصدر ديال (الإثارة) ديالو؟

- واش غتقبل ترجع ليه إذا كان محتااج يرجّع مصدر (إثارتو) مرة أخرى؟

وهنا (مصدر الإثارة) المقصود بيها هي نتي آبب فهمتيني؟ هو (المرأة) .. حيتاش الراجل كتجذبو غير غريزتو فقط تجاه المرأة، هادشي فاايت قلتو ومازال غنشرحو ليك فبوسط آخر آكبيدااتي..

أكرر.. (مصدر الإثارة) يقدر يكون هو (الحوا) الفِعلي، ويقدر يكون هو (الحوا) موقوف التنفيذ فهمتيني آبب؟ يعني (الرغبة فالحوا) .. ويقدر يكون مصدر جمالي (كتعجبيه) وكذا.. وجمالك كيغذّيلو الفونطازماات ديالو فهمتيني آبب؟ .. ونزيدك : مصدر الإثارة عند الكلبوب يقدر يكون غا جزء منك فقط، يقدر يكون كيتفونطاازما غي على رجيلاتك فقط أو على طريقة الهضرة ديالك معاه.. المهم هادشي كااااامل كيتمحور حول الجنسانيَّة والحوا آبب فهمتيني؟ الكلاب هرموناتهم هي المسيطرة عليهم، داكشي دالعواطف والمشاعر كيبقى مجرد كذبة وتغليف فهمتيني آبب؟ وفأقصى الأحوال كيكون شيء هامشي وثانوي عند الكلبوب، الجنس هو جوهر الموضوع..

هنا الكلبوب فاش كينوي يتفارق مع البنت لأول مرة كتجيه صعييبة نسبيًا (بإختلاف وضعيتو وإمكانياتو) فهمتيني بب؟ .. حيتاش كيكون عندو (حاجز نفسي) كيخليه نوعًا ما لااصق فالبنت وماباغيش يضيّعها من يدو! خصوصًا إذا كانت (مقحبنة) ومهلية فراسها وحاطّاه تحت صباطها هنا التعلّق بها والإلتصاق فيها كيزييد.. ماكيقدرش يتفارق عليها بسهولة فهمتيني آبب؟ حيتاش ذاك (الحاجز النفسي) ديالو كيقول ليه (أذاك الطامل راه صعييب تلقى مصدر ديال الإثارة فحال هذا) .. و (راه سااهل باش يجي راجل آخر ويتمتّع بمصدر إثارتك) .. و (راه غالبًا ماغاديش تقبل ترجع ليك) إذا بغيتي ترجّعها، وزيد وزيد..

هنا الكلبوب كيفكّر ألف مرة قبل مايضيّع البنت من يدو فهمتيني آبب؟ وكتكون غالية عندو فاللول وخاايف يخسرها.. (هادشي كينطاابق على البنات اللي مهليات فراسهم ومتحررات بطبيعة الحال) .. أمّا البنت اللي حتى ظفيراتها ماكتصبغهمش ومامضوراش بيها الكلاب وماكتعطيش للكلبوب إشارات جنسيَّة وكتكون معقّدة شوية وداكشي.. هادي راه مرفوع عليها القلم آكبيدات ماداوويش عليها والموضوع لا يعنيها..

.

أشنو كيوقع فاش الكلبوب كيتفارق مع البنت وكيرجع ليها من بعد؟

الحاجز النفسي اللي هضرنا عليه كيتهرس آبب فهمتيني؟ .. الكلب كيلقى أجوبة على دوك 3 دالأسئلة اللي كانوا محيرينو فاللول، وكيعرف أنهُ قاادر (يلقى مصدر آخر ديال الإثارة) بسهولة.. (أو العكس) حسب إمكانياات الكلب وواش البنات كيعطيوه وقت ولالا..

ثانيًا : كيعرف أنهُ (وقتما رجع لمصدر إثارتو) غايلقاه موجود وكيتسناه، وبالتالي الإحتمال ديال (غايجي راجل آخر وياخذ ليه مصدر إثارتو) ماكيبقاش عندو قيمة فهمتيني آبب؟ وجوده كعدمه، حيتاش هو فكلتا الحالتين عاارفك (مذلولة) وضاامنك، يعني عنصر التهديد والغموض واللاإستقرار ماكيبقاش، الكلبوب كيولي مرتااح من جيهتك وهادشي كيخليك (ترخااصي) وكيخلي الأسهم ديالك يطيحو..

- يعني كنتي (إلهة) وغترجعي (عبدة) فهمتيني آبب؟ السلاح الأقوى والأعظم ديالك كامرأة غايفقد الفعالية ديالو، وماغتبقاش عندك قيمة (فالعلاقة الثانية) ديالك معاه..

.

هذا السبب الأول..

السبب الثاني : هو أنكِ فاش كترجعي لكلبك القديم كترجعيلو بحُمولة ديال الأفكار والإنطباعات الإستباقيَّة الخاااطئة آبب فهمتيني؟ توقعاتك كلها كتكون خاطئة..

- علاش ؟

حيتاش فاش كيرجع ليك كلبك القديم كااتوققعي أوطوماتيكمون أنّ گاع دوك لحواايج اللي ماكانوش كيعجبوك فيه راه تمّة معالجتها! حيتاش منطقيًا مايمكنش يرجع لييك وهو باقي على عادتو القديمة! هادشي اللي كتفهميه نتي آبب، وهادشي كلو خاطيء ثيقي بيا .. راه كون كان غايتبدّل على ودك كاان غايتبدّل فاللول فاش كان عندو ذاك (الحاجز النفسي) ضاغط عليه نفسيًا وجنسيًا فهمتيني آبب؟ أمّا دابا راه ماغاديش يتبدّل وماغاديش يندم ثيقي بياا هو باغيك ترجعيلو فقط باش يسترجع (مصدر الإثارة) ديالو فهمتيني آبب؟ الكلااب فالمغرب راه ماكيتبدّلوش وخصوصًا على ود امرأة فهمتيني آبب؟ مازال ماوااصلينش لدرجة تقديس وإحترام المرأة اللي غتخليهم يحطّوها فمرتبة مركزية فحياتهم وغايتبدّلو على ودها فهمتيني آبب؟ فيقي وعييقي آبب راكي غير فالمغرب، ماتخليش الكلبوب يلعب ليك بعقلك..

السبب الثالث : الكلابيب راهم مراضين (بالتعدد) آبب فهمتيني؟ الراجل فاش كيتصاحب مع البنات بزاف هادشي كيخليه يحس براسو خلااط ومقود، وحتى من الناحية الجنسانيَّة هادشي كيحرك فيه فونطازمات وشهوات كثيرة، يعني كيتلذذ فاش كيخلط اللحم وكيهضر مع بزااف دالبنات فهمتيني آبب؟ .. غالبًا هادشي علاش الكلبوب واخا كيكون (مصاحب) كيتشهاا يرجع للبنت اللي كان معاها! والبنت المسكينة كثيق مع الأسف وكتحس (بتضخم الأنا) حيتاش كتحس بيه (فضّلها على صاحبتو) .. وهادي هي أكبر نقطة ضعف كاينة عند البنات (نزعة التفرد) .. وديما الطوامل كيستغلوها باش يضحكو على بنات الناس..

السبب الرابع : فاش كترجعي لكلبك القديم كترجعيلو بكمية إحتمال وصبر ضئيلتان آبب فهمتيني؟ وبالتالي أعصابك كتكون مُهددة وهادشي يقدر يجيب ليك (إضطراب هرموني) اللي ممكن يتسبّب ليك فإختلال فالتعايُش الصحي ديال الكائنات الحية فتوتوك آبب فهمتيني؟ وممكن يتسبّب فعدة أمراض أخرى، .. فاش كترجعي لكلبك القديم وكيدير معاك شي تصرف نااقص (كتقولي مع راسك) تااني آ لحمار؟ تاني كتعاود نفس التصرفات.. وكتبقاي تلومي راسك حيتاش رجعتي ليه، يعني حياتك كتولي عذااب فهمتيني آبب؟ حيتاش ردود أفعالك كتكون مشحوونة بزااف بزاف، وهادشي كضري بيه غير راسك

السبب الخامس : الحياة الجامدة ماحياة ما تا وزة آبب فهمتيني؟ كلبوب داز فحياتك صاافي خاصك تعفطي عليه برجليك وتدوزي، وتصاحبي مع كلاب جداد وتجربي موديلات جداد وزبوبة جداد وطوموبيلات جداد وأساليب جداد وتجارب جداد.. علاش غتبقاي متقوقعة فصندوق واحد آبب؟ علاش باغية تعيشي حياة سالبة وسلبية؟ علاش باغية تبقاي مسجونة فالماضي؟ راكي ماعمّرك غتذوقي السعادة بهاد العقلية آبب ثيقي بيا غتبقاي ديما جامدة فبلاصتك وكتحاولي تعالجي نفس المشااكيل يوميًا بلا فائدة، مهاراتك فالحياة غتكون قليلة وخبرتك غتكون منعدمة وتجاربك غتكون عقيمة، ومع الوقت غتولي متشااءمة وغتهملي راسك وجمالك، وفاللخر غتلقاي حياتك ضااعت مع كلبوب ماكيستاهلش حتى حزقة منك ولالياتك عاشو داكشي اللي ماحلمتيش بيه نتي! حيتاش هوما غادياات مع الحياة ونتي جامدة فبلاصتك..

- صبيعاتي عيااو بالكتابة وحناك طرمتي ضروني آكبيدات .. كاينين بزاااف دالأسباب هادشي غا اللي طاحلي فعقلي دابا المهم أنكِ ماترجعيش لكلبك القديم آبب فهمتيني؟ ماترجعييش ليه نهائيًا، وموواح