العلاقات الغرامية و تأثيرها على بناء المستقبل
حل ليا ودنين دماغك مزيان راني داوي معاك من قلب العقل الواعي.
ايلا شفتي راسك تورطتي ف علاقة و حسيتي براسك لا علاقة، كاضيع فالوقت و تحرق فالباتري و تهلك فالطاقة
حسيتي براسك دخلتي فدوامة إعاقة و طلعات معاك الندامة و حسيتي براسك رتاكبتي حماقة بدات بجادوغ و كومونطيغ و آكسيبتي طلب صداقة ...
غانقول ليك هضرة وحدة و لي هي : Block
ما تفكرش جوج مرات، حيد الكبدة و العاطفة قبل ماتخلي دار باباك العاصفة، لأنه اللهم تبلوكي بنادم و لا تبقا طول حياتك نادم ...
العلاقات العاطفية ايلا ما زادوش بيك للقدام، فكون على يقين غا يردوك اللور، ما كايناش شي حاجة سميتها الوسط.
ايلا ما لاحظتيش أن حياتك بدات كاتطور، و مستواك بدا كايتحسن ملي دخلتي فديك العلاقة، فعرف أنك تورطتي، و بالتالي قلب على أقرب باب تخرج منو، و لي هو بلوك من دون اعتذار، و من دون سابق إنذار و من دون شرح، غبر ليك الشقف بحال إلى ما عمرك كنتي.
هذا لا يعني أن جميع العلاقات العاطفية مدمرة، و لكن فحالة ماشتيهاش كاتعاونك تبني مستقبلك، ف وعا و بلا ما تكعا أن حياتك غاتدمر.
لأنه فوقتنا الحالي صعيب تلقا داك الإنسان ( سواء بنت أو دري ) لي يفهم أن الحب الحقيقي مواقف و ماشي هضرة لي ما تشري خضرة.
الحب ديال بصح هو ملي نخلي ليك vu ما تفهمش منها أني حتاقرتك أو تجاهلتك و لكن كايعني أني مشغول كانبني مستقبلنا ( مشي كلشي بطبيعة الحال كاين لي كيديرها لغاية في نفس يعقوب! ).
صعيب تلقا داك الإنسان لي كايتحكم فالمشاعر ديالو كتر من ما مشاعيرو كايتحكمو فيه.
صعيب تلقا داك الإنسان لي ملي تصوني عليه و تجاوبو خفا زربا، سمحلي راني مشغول دابا، حتا نسالي و نتاصل بيك.
و يفهمها و يقدرها، و ما ياخدهاش شخصية و يقول تكبرتي عليه.
صعيب تلقا داك النوع البشري لي يفهم السكات ديالك.
celui qui ne comprend pas ton silence, n'arrivera jamais a comprendre tes mots.
لي كيفهم الصمت ديالك و أنك مرة مرة كاتحتاج تبقا بوحدك
تنعازل و تبعد على العالم باش تراجع أفكارك و تتصالح مع ذاتك
صعيب تلقا داك النوع لي تكون مشهي تهضر معاه و تسهر معاه و يقول ليك، خدمتك هي الأولى، قرايتك هي الأولى.
صعيب تلقا داك النوع لي فاهم الحب بأنه ماشي هو
نجلسو نشوفو فبعضياتنا، مقابلين حاضيين بعضياتنا
الحب لي هو نحضيو أهدافنا و خططنا و مستقبلنا
صعيب تلقا شي حب لي يبنيك ما كاين غير لاموغ لي يخذرك و يلهيك.
الحب ماشي هو نحلم بيك و تحلم بيا.
و لكن هو نخدمو على أحلامنا بجوجنا على أهدافنا
لي ماشي بالضرورة يكونو بحال بحال.
الحب ماشي هو بغيني نبغيك الحب هو بين ليا و نبين ليك،
برهن ليا و نبرهن ليك.
الحب الحقيقي هو ماشي هو ديما نكون قريب منك
الحب الحقيقي هو نتقربو بجوجنا من طموحاتنا
و من الصورة لي بغينا نوصلو ليها فالمستقبل.
الحب ماشي هو ملي نتفكرك نوض نسول فيك.
الحب هو ملي نتفكرك نوض نكمل الخدمة ديالي لي بديتها وما ساليتهاش.
الحب هو نبنيو بجوج قصر الحرية و الأمان و الإستقرار المالي.
عارف أنه ماشي غير صعيب علينا نلقاو هاد النوع البشري
بل الاصعب هو نكونو هاد النوع.
و لكن صعيب أو أصعب لا يعني أنه مستحيل.
غير هو العزلة و الوحدة واخا مرة فالتذوق ديالها واخا قاصحة فالعشرة ديالها، إلا أنها ما عمرها غادي تقول ليك مالك ما سولتيش فيا أو مالك تبدلتي عليا أو مالك خليتي ليا vu.
النصحية الأخيرة ليكي هي :
تصاحب مع الوحدة ديالك و تونس بيها على ما تلقا
شريك الحياة ديالك.
و ما تيقش و ما تتغرش فديك الماركة لي كا تعاود ليك على
شنو باغا دير، أو شنو كا تحلم دير، أو شنو ناوية دير ...
قولها توريك شنو دارت ؟
لأن أي واحد فينا كايكون فنان ملي كايعاود على راسو
فنان فرسم ديك الصورة المثالية لي بغا يوصل ليها
و لي مازال ما دار حتى الخطوة الأولى باش يمشي ليها.
كان الهدف ديالي من هاد لارتيكل نحطم داك الصنم ديال الحب لي رسخاتو فينا الأفلام الدرامية الغرامية التركية و المكسيكية و الهندية، و نوريك الحب
0 Comments
إرسال تعليق