نصائح نسائية

مارس 17, 2021   

***المقال الثامن ***

#نصايح 2

حبيت اقدم شويه نصايح لصحباتى وحبايبى اللى على الاكونت فجمعت اللى اقدر عليه

واللى اعرف افيدكم فيه من خلال مجالى والبحث برضو

#الشكل_الخارجي

- اللبس متبقيش متكلفة عشان التفاصيل الكتير مزعجة ، اهم حاجة يكون لايق على جسمك ومش مركز على العيوب ، والبساطة وتناسق الالوان هم سر الشياكة .

#دماغك

مش شعرك وكده... لا دماغك تفكيرك وانتي ناضجة ولا لا،، بتتغيري للاحسن ولا لا،، بتقري؟ عن مواضيع ايه؟ مهتمة بالدين وعايزه تفهمي اكتر؟ مين اصحابك وبتتكلموا في ايه؟ اللي حواليكي بيشدوكي لتحت ولا بياخدوكي لفوق؟

لازم زي ما بنستحمى جسمانيا نستحمى فكريا كل فترة ونعمل فلترة للحاجات اللي بتدخل دماغنا عشان المخرجات تبقى نضيفة

#شخصيتك

بلاش تقولي اوحش حاجة فيا اني طيبة زيادة عن اللزوم وساذجة واجابات البنات دي اللى كل بنت بتقولهالى انا طيبه يا دكتور... لا فيكي عيوب . اعرفيها مش عشان تحاولي تقومي السلوك علشان جوزك مش كل حاجة هيضايق منها هيقولك عليها .. وطول الوقت بتبقي شايفه عيوبه وناسيه نفسك

نصايح لحياتكم المشتركة

#اتعلمي_الطبخ

جربي وافشلي مش عيب ولا حرام . الانترنت فيه كل حاجة وهيساعدك كتير ،، الطبخ حاجة مهمة والراجل بيحب الست اللي بتعرف تطبخ ، والاكلة الحلوة مش لازم يكون فيها الغالي والجديد ، الاكلة الحلوة ممكن تكون على قد الايد.. على راي نجلاء الشرشابي ... شوفي مصروفك يقدر يجيب مقادير ايه وعلى الاساس ده دوري على وصفات ، مش العكس

#الثقافة_الجنسية

اقري واسمعي من متخصصيين عشان تفهمي صح بدون خرافات ... اياكي تتناقشي في الحاجات دي وتحكي تفاصيلها لحد مهما كان الا لو كان لاخذ مشورة طبية مثلا وغيره .. اتعلمى ازاى يكون عندك فن فى العلاقه ودى انا بنصح ستات كتييير بيها لانها حقيقى بتصلح المشكلات اليوميه وبعدين دى غريزه لازم تمارس على الشكل الطبيعى ,,,لو فيه اى مشكلات اسالى فيها متخصص... انا كاتبه مقال عن البرود الجنسى للستات اقريه هيفيدك

#النضافه_الشخصيه

مش هتكلم فيها كتير فيه الف حاجه تهتمى بيها فى النضافه الداخليه ولو متعرفيش تبقى معفنه لو احتاجتى اى نصايح فيها تحت امرك وممكن انزل مقال بيها لو الطلب كان كتير عليها

#الحب_والرومانسية

انسي المسلسلات التركي .. انسي الافلام ... اقولك على حاجة انتي خدتي اكبر قلم من الفن واللي بيقدمه عشان بيتعملنا غسيل مخ .. الحب موجود بعد الجواز بس مش شرط يكون بنفس الصورة اللي انتي متخيلاها .. متحاسبيش جوزك على حاجة في دماغك هو ميعرفهاش ... مش لازم يجيبلك نفس الهدايا اللي بتجي لغيرك او تتصوروا وتخرجوا في نفس الاماكن اللي بتشوفي اصحابك فيها .. عيشى حياتك انتي بدون ما تكوني نسخة مكرره من الاخرين ....اعذرى جوزك لو نسى او مش بيخرجك انا عارفه اننا كلنا محتاجين الكلمه بس نراعى الراجل برضو

#الميزانية_والمصروف

لازم تتفقوا مين هيمسك المصروف، ومتحوشيش حاجة من وراه، ولو بتحبي تكتبي يبقى خير وبركة تكتبي بتصرفي ايه وهكذا، وبلاش يكون كل المصرزف مع الراجل عشان هيطير، وعيشي وهاتي حاجاتكوا متناسبة مع الفلوس اللي بيقبضها...بلاش تضحية زيادة ولا استغلالية، خير الامور الوسط

انتي والاطراف الخارجية بره بيت الزوجية

#حياتك_مع_أهله

كما تدين تدان، لو معرفتيش تحبي اهله على الاقل متكرهيهمش او تعملي فيهم حاجات من تحت لتحت وشغل كيد النسا غلب كيد الرجال ده. واياكي تسمعي نصيحة حد بيدلك على الشر وانك كده تبقي شاطرة وواعية....كله بيجي عل دماغك في الاخر وولادد هيردوهملك.... خلي عندك سنس ولا تكوني تقيلة وتعامليهم براحتك كانهم اهلك ولا تكوني بارده تعامليهم كانهم اعدائك ....برضوو للناس اللى بتشتكى من اهل جوزها هبقى انزل مقال ازاى تتعاملى معاهم

#حياتك_مع_اصحابك

اوعي تبعدي عن اصحابك البنات اللي بتحبيهم وتخلي جوزك هو محور حياتك، عشان هتتعبي نفسيا كأنك بتلفي حوالين نفسك وهتتعبيه معاكي لان الراجل مش بيحب الست الفارغة، في نفس الوقت يستحسن متدخليش اصحابك في حياتك الشخصية مع جوزك حتى لو هم كويسين، يكون كلامك عن حياتك كلام عام وسطحي وده لمصلحة الكل... ولو متخانقه معاه اوعي تتكلمي عليه وحش معاهم او مع اي حد